Зетот на турскиот претседател Реџеп Таип Ердоган се повлече од позицијата министер за финансии, споменувајќи здравствени причини, пренесуваат турските медиуми.
„Откако бев министер скоро пет години, донесов одлука да не ја продолжувам мојата служба (како министер за финансии) поради здравствени проблеми“, рече Берат Албајрак во пораката на Инстаграм.
Според агенцијата АП, Албајрак (42) е министер за финансии од јули 2018 година, а претходно беше министер за енергетика три години.
Неговата оставка уследи по смената на гувернерот на турската централна банка Мурат Ујсал, кој беше заменет со поранешниот министер за финансии Наџи Агбал.
Аналитичарите се сомневаат во причината за оставката на Албајрак. Некои споменуваат дека поранешниот министер сега имал добри односи со Кушнер, советник на американскиот претседател Доналд Трамп.
Се додава дека овие односи повеќе не се важни за Ердоган затоа што Трамп загуби на претседателските избори.
Албајрак е оженет со ќерката на Ердоган, Есра и имаат четири деца.
TV21/Sozcu
