Министерот за надворешни работи на Република Турција, Мевлут Чавушоглу, изјави дека неговата земја очекува дека Европската Унија (ЕУ) ќе дејствува како чесен посредник во регионот на Источниот Медитеран, пренесува Агенција Анадолија (АА).
„Ако сте дел од проблемот, како можете да посредувате меѓу Турција и Грција?“, изјави Чавушоглу во своето обраќање до Одборот за надворешни работи на Европскиот парламент.
Грција се обиде нелегално да го ограничи турското поморско подрачје, обидувајќи се да го исцрта кај своите брегови на малите грчки острови во близина на турскиот брег.
Турција тврдеше дека двете страни би требало наместо тоа да водат дијалог за да се постигне најдобро решение засновано на чесна поделба.
„Подготвени сме за дијалог без какви било предуслови. Доколку Грција инсистира на предуслови, и ние ќе го сториме тоа“, изјави Чавушоглу.
Како што изјави тој, ставот на Турција е во согласност со меѓународното право и се заснова на различни одлуки на судовите. Чавушоглу изјави и дека Турција не сака напнатост во Источниот Медитеран.
Грција неодамна спроведе воени вежби, во кои учествуваше и Франција, чија цел е заплашување на Турција, со цел да ги запре енергетските истражувања. Исто така, Грција нелегално ги вооружи егејските острови, прекршувајќи ги долготрајните мировни договори.
Неодамнешниот договор на Атина за поморското разграничивање со Египет исто така го крши континенталниот појас на Турција и нејзините поморски права, што предизвика дополнителни тензии меѓу двата соседи.
Турција, земја со најдолг брег на Медитеранот, испрати наменски бродови за да изврши енергетски истражувања во својот континентален појас, велејќи дека Турција и Турска Република Северен Кипар (TRNC) имаат права во тој регион.
Anadolu
