Македонските оператори го започнаа својот едночасовен протестен прекин на реемитувањето на сите телевизиски канали, освен МТВ, во знак на протест поради наметнати неуставни обврски во Законот за аудио и аудиовизуелни услуги.
“Во знак на протест, денес, 21 јуни, времено ќе го прекинеме реемитувањето на сите телевизиски канали, освен јавниот сервис МРТ! Причината е неуставната законска регулатива која наметнува одговорност надвор од наша надлежност, на штета на богатата ТВ понуда за корисниците. Жалиме што сме принудени на ваков чекор и се надеваме дека наскоро ќе се изнајде соодветно решение”, пишува на официјалните Фејсбук страници на Телеком и А1.
„Откако вчера не успеавме да се договориме со претставниците на македонските национални телевизии се одлучивме на овој протест – едночасовен прекин на програмата. Што ќе преземеме во иднина ќе се договараме на дневна основа и ќе ги известиме нашите корисници и граѓаните. Можни се и порадикални мерки, вели Тони Тошевски, директор во кабелската телевизија „Мултимедија“ и претседател на управниот одбор на Здружението на кабелски оператори на Македонија, пренесува “Вечер”.
Операторите се жалат дека се приморани на оваа непопуларна мерка поради наметнатите нови правила кои, како што велат, се неприменливи и од 6 август ќе мора да ги изгасат каналите.
Тоа се должи на измените на Законот за аудио и аудиовизуелни и медиумски услуги, што Собранието ги донесе на денот на распуштањето, по скратена и нетранспарентна постапка и без претходна јавна расправа.
Операторите велат дека законските измени им наметнуваат обврска да гарантираат за авторските права на програми кои тие не ги произведуваат, туку само ги реемитуваат и за тоа да сносат материјална и кривична одговорност. Оваа законска обврска за операторите претставува состојба на виша сила и е неприменлива затоа што операторите кои реемитуваат програма не можат да имаат ниту контрола, ниту одговорност за тоа дали се регулирани авторските права за сите поединечни програми што ги создаваат и емитуваат телевизиите.
