Врховниот суд во Израел денес го укина законот со кој ретроактивно се легализираат околу 4.000 домови имигранти изградени на приватно земјиште во окупираниот Западен Брег.
Деветчлениот судски совет гласаше за укинување на законската мерка од 2017 година, според која имигрантите можат да останат на тоа земјиште ако нивните домови биле изградени без претходно знаење за палестинската сопственост на земјиштето, или ако тие биле изградени по државен налог. Осум судии гласаа против, а еден беше за законот.
Групите за човекови права велат дека таа мерка легализира повеќе од 50 домови за имигранти, изградени без одобрение од владата.
Законот „ги крши сопственичките права на палестинските жители на нееднаков начин, притоа давајќи приоритетен статус на имотните интереси на израелските имигранти“, рече главниот судија Естер Ејхут во писмено образложение за пресудата на судскиот совет.
Десничарската партија „Ликуд“ на премиерот Бенјамин Нетанјаху рече дека е „тажно“ што судот мораше да интервенира „во важен закон за имигрантските активности и нивната иднина“ и ќе работи на повторно воспоставување ваков закон.
Новиот коалициски партнер на Ликуд, Сината и белата партија, соопшти дека законот „е во спротивност на уставната ситуација во Израел во својот формат, а нејзините правни проблеми беа познати во времето кога беше усвоен“.
Под водство на Нетанјаху, владата вети проширување на суверенитетот над еврејските населби и долината Јордан на Западниот Брег, територија окупирана од Израел во Блискиот исток во 1967 година и барана од Палестинците како дел од нивната идна држава.
Владата треба да започне разговори за де факто анексија на 1 јули, но не е јасно дали најголемиот сојузник на Израел, САД, ќе даде зелено светло за тоа.
Палестинците го отфрлија мировниот план на американскиот претседател Доналд Трамп, врз основа на кој повеќето од населбите ќе бидат вградени во „неотуѓива израелска територија“, пренесува Ројтерс.
(Вијести.ба / ФЕНА)
