Европската Унија ја избра Бугарката Кристалина Георгиева за шефица на Меѓународниот монетарен фонд (ММФ), јавува Anadolu Agency (AA).
Георгиева, која во моментот е главен извршен директор на Светската банка, го порази поранешниот холандски министер за финансии, Јероен Дијселблом, по два круга гласање.
Гласањето следуваше откако Кристин Лагард минатиот месец поднесе оставка на функцијата шеф на ММФ, за да ја преземе новата улога на следниот шеф на Европската централна банка (ECB). Таа беше директор на ММФ од 2011 година.
„Ѝ честитам на Кристалина Георгиева за резултатот од денешното европско гласање. Ѝ посакувам најголем успех“, напиша Дијселблом на Твитер.
Претседателот на Комисијата на Европската Унија, Жан-Клод Јункер, исто така ѝ честиташе на Георгиева на Твитер, велејќи: „Вие ги имате сите потребни квалитети за да дадете ефективен придонес во мисијата на ММФ.“
