Рускиот претседател Владимир Путин денес изјави дека моменталната ситуација, која се карактеризира со зголемени воени тензии, може да доведе до нуклеарна војна која ќе ја уништи планетата, јавува Anadolu Agency (AA).
„Светот ја потценува сериозноста на можниот развој на моменталните настани“, изјави Путин за време на годишната прес-конференција на која присуствуваат над 2.000 новинари, а која се одржува во конгресната сала на Меѓународниот трговски центар во Москва.
„Повлекувањето на Соединетите Американски Држави од Договорот за антибалистички проектили и нивната намера да го напуштат Договорот за нуклеарно вооружување од среден дострел (INF), кои претставуваат столбови на контролниот систем за меѓународно оружје, го намалуваат прагот за примена на нуклеарното оружје, што за возврат може да предизвика глобална нуклеарна катастрофа“, рече Путин.
„Се надевам дека човештвото ќе има доволно здрав разум да не се доведе до крајната точка“, додаде тој.
Ова е прва голема прес-конференција на Путин, на која тој ги проценуваше главните настани од 2018 година, откако беше повторно избран за претседател по четврти пат.
