По повод 100. годишнина од завршувањето на Првата светска војна, Париз утре ќе биде домаќин на повеќе од 70 шефови на држави, јавува Anadolu Agency (AA).
Меѓу бројните лидери се очекува и присуство на турскиот претседател Реџеп Таип Ердоган, рускиот Владимир Путин, како и американскиот претседател Доналд Трам. Мировниот договор е потпишан на 11 ноември 1918 година, и по тој повод утре во Париз ќе биде и официјалното одбележување на оваа годишнина.
Поминаа 100 години од завршувањето на Првата светска војна, која ја смени политичката мапа на светот и во која беа повредени и загинаа повеќе милиони луѓе.
Во 1914 година, Австро-Унгарија ѝ објави војна на Србија, и така ја почна Првата светска војна. Непосредна причина за војната беше атентатот на австроунгарскиот престолонаследник, надвојводата Франц Федрдинанд, кој се случи еден месец порано во Сараево.
Првата светска војна беше и глобален вооружен судир помеѓу два сојуза на држави (Антантата и Централните сили), кој се одвиваше на повеќе континенти, помеѓу 1914 и 1918 година. Последиците од војната, меѓу другото, беа повеќе од 40 милиони жртви, вклучувајќи околу 20 милиони загинати војници и цивили и значително уништување на држави, и се смета за прва војна од глобални, светски размери.
Поради тоа првично е наречена Големата војна или Војна која ќе ги заврши сите војни. Првата светска војна важи за еден од најсмртоносните судири во модерната човекова историја.
Војната која е завршена со потпишување на капитулација на Германија, траеше четири години, а покрај воените жртви, дојде и до појава на различни болести и епидемии.
Русија и Германија се две земји кои дадоа најмногу жртви во Првата светска војна. Имено, во Првата светска војна загинаа 1,8 милион руски и 1,7 милион германски војници. Трета земја е Франција со 1,3 милион загинати војници.
