Соединетите Американски Држави воведоа санкции за седум ирански функционери во четвртокот поради прекин на пристапот до интернет и задушување на мирните протести по смртта на 22-годишната Махса Амини во притвор на верската полиција.
Американското Министерство за финансии воведе санкции за иранскиот министер за внатрешни работи Ахмад Вахиди, министерот за комуникации Еиса Зарепур и Вахид Мохамад Насер Маџид, шеф на иранската сајбер полиција, се вели во соопштението. „САД го осудуваат исклучувањето на пристапот до Интернет по налог на иранската влада и насилното задушување на мирните протести“, изјави заменик-секретарот за финансии Брајан Нелсон. САД нема да се двоумат да воведат санкции за оние кои „управуваат и поддржуваат такви активности“, додаде тој.
Немирите низ Иран предизвикани од смртта на Амини прераснаа во огромен предизвик за иранските свештенички лидери, при што демонстрантите повикуваат на пад на Исламската Република, основана во 1979 година. Групите за човекови права велат дека илјадници се уапсени и стотици повредени во задушувањето на протестите од страна на безбедносните сили, вклучително и Басиџ, доброволна паравоена единица поврзана со иранската Револуционерна гарда. Здруженијата проценуваат дека загинале над 150 луѓе.
geopolitikanews
