Либискиот претседателски совет синоќа најави формирање Национална комисија за помирување, што ќе служи за воспоставување социјален мир, јавува Агенција Анадолија (АА).
Шефот на Претседателскиот совет, Мохамед ал Менфи, изјави дека Комисијата ќе воспостави правда меѓу Либијците и ќе создаде солидарност во земјата. Тој зборуваше за време на прес-конференцијата во главниот град Триполи, на која исто така присуствуваа заменик-претседателите на Советот, Муса ал-Кони и Абдула ал-Лафи.
Ал-Менфи не даде понатамошни детали за структурата или активностите на Комисијата.
Ал-Менфи на 1 април се состана со либиските експерти за да дискутираат за воспоставување на Национална комисија за помирување.
Сегашниот либиски Претставнички дом е поделен меѓу пратениците во Триполи на чело со Мохамад Сијала и пратениците во Тобрук на чело со Агила Салех. Во моментов нема точни бројки за бројот на членови во секоја група поради индивидуалните оставки и смртни случаи.
На 5 февруари, ривалските политички групи на Либија се согласија во разговорите со посредство на ОН да формираат привремена влада на единство што ќе ја одведе земјата на избори овој декември, назначувајќи го премиерот Абдул Хамид Дбеибех и давајќи му задача да формира нова влада.
Либијците се надеваат дека ќе се стави крај на повеќегодишната граѓанска војна што ја зафати земјата по соборувањето и убиството на силниот човек Моамер Гадафи во 2011 година.
Anadolu Agency
