Иран разви хиперсонична ракета способна да ги пробие сите одбранбени системи, изјави денеска генералот Амирали Хаџизадех, командант на воздушната единица на неговата Револуционерна гарда.
Хиперсоничните проектили, како и традиционалните балистички ракети способни да испорачуваат нуклеарно оружје, можат да летаат повеќе од пет пати поголема од брзината на звукот. „Оваа хиперсонична балистичка ракета е развиена за да се спротивстави на штитовите за противвоздушна одбрана“, изјави Хаџизадех, цитиран од иранската новинска агенција ФАРС. „Ќе може да навлезе во сите системи за противракетна одбрана“, рече генералот, додавајќи дека верува дека ќе поминат децении пред да се развие систем што би можел да го пресретне.
„Овој проектил, кој ги гаѓа непријателските противракетни системи, претставува голем генерациски скок во областа на ракетите. Соопштението доаѓа откако Иран во саботата призна дека испратил беспилотни летала во Русија, но рече дека тоа го сторил пред војната во Украина. „Вашингтон пост“ на 16 октомври објави дека Иран се подготвува да и достави балистички ракети на Русија, но Техеран го отфрли извештајот како „целосно лажен“.
За разлика од балистичките ракети, хиперсоничните проектили патуваат ниско во атмосферата, потенцијално побрзо достигнувајќи ги целите. Тестот на хиперсонична ракета од Северна Кореја минатата година предизвика загриженост за трката за стекнување на технологијата. Во моментов Русија води во трката за развој на ракети, а по неа следат Кина и САД. Москва во август објави дека распоредила авиони опремени со најнови хиперсонични ракети во Калининград, руска енклава опкружена со земји на НАТО. Војната во Украина ја зголеми тензијата во енклавата Калининград. Во март, на почетокот на инвазијата на Украина, Русија употреби хиперсонични ракети Кинжал, што веројатно беше првата употреба на овие ракети. Во март, американската влада воведе санкции кон Иран поради активности поврзани со проектили.
Во тогашното соопштение, беше кажано дека казнените мерки следуваат по „неодамнешниот ирански ракетен напад врз Арбил во Ирак, како и ракетните напади на сојузниците на Иран Хутите против Саудиска Арабија и Обединетите Арапски Емирати“. „Овие напади се потсетник дека развојот на Иран и ширењето на балистички ракети претставуваат сериозна закана за регионалната и меѓународната безбедност“, соопшти тогаш Вашингтон.
