Американскиот претседател Џо Бајден ќе го започне процесот на префрлање на борбени авиони Ф-16 во Турција во договор со Конгресот, изјави во вторникот американскиот советник за национална безбедност Џејк Саливан, пренесува Ројтерс.
Говорејќи пред самитот на лидерите на НАТО подоцна во вторник во литванската престолнина Вилнус, Саливан рече дека претседателот Џо Бајден „јасен е дека го поддржува трансферот“. „Тој не постави никакви ограничувања за тоа. Тој има намера да започне со овој трансфер“, рече тој. Саливен не даде никакви детали за временскиот период во кој тоа ќе се реализира.
Доцна во понеделникот, турскиот претседател Таип Ердоган се согласи да го достави до турскиот парламент гласање за ратификација на шведската апликација за членство во НАТО, по повеќемесечниот притисок од САД и нивните сојузници.
Некои партнери во НАТО веруваат дека Турција, која во октомври 2021 година побара купување на авиони Ф-16 и најмалку 80 комплети за модернизирање на постојните борбени авиони по цена од 20 милијарди долари, го искористи шведското барање за да изврши притисок врз Вашингтон во поглед на авионот.
Саливан, исто така, рече дека НАТО ќе испрати „уникатен, позитивен сигнал“ до сојузниците за патот на Украина кон членство за време на самитот, што е главна тема на разговорите во Вилнус.
