Словенечкиот премиер Роберт Голоб оваа недела ги обвини „странските служби“ за мешање во изборите во недела, откако беше откриено дека претставници од израелската приватна шпионска фирма „Блек Кјуб“ ја посетиле земјата во декември и се сретнале со главниот кандидат на опозицијата, Јанез Јанша.
Група новинари и активисти од невладината организација „Институт 8 март“ тврдат дека претставниците на „Блек Кјуб“, вклучувајќи го и нејзиниот директор Дан Зорела и советникот Ѓора Еиланд, поранешен шеф на Советот за национална безбедност на Израел, се сретнале со ветеранската политичка фигура Јанез Јанша во Љубљана на 22 декември, врз основа на записи од летот и други разузнавачки информации.
Разузнавачката и безбедносна агенција на Словенија го потврди пристигнувањето на претставниците на „Блек Кјуб“ во декември, но не можеше да потврди дека се сретнале со Јанша, лидерот на опозициската партија СДС, која води на анкетите.
„Блек Кјуб“ не одговори на барањето за коментар. Јанша негира дека се сретнал со компанијата.
Политика за Блискиот Исток
Доколку произраелската партија СДС на Јанша победи на изборите во недела, тоа веројатно ќе ја промени политиката на Словенија кон Блискиот Исток, бидејќи либералната партија Движење за слобода на сегашниот премиер Роберт Голоб беше гласна во својата поддршка за Палестинците.
Под негово водство, Словенија призна независна палестинска држава и минатата година воведе забрана за увоз на стоки произведени на палестинските територии окупирани од Израел.
Голоб им рече на новинарите во вторникот дека „фактот дека… странски служби се мешаат во изборите на демократска земја-членка на Европската Унија е нешто нечуено“.
Во дебатата меѓу Јанша и Голоб во понеделник вечерта, сегашниот премиер рече дека ова е „најголемиот скандал што сме го виделе во Словенија од независноста“.
