Белгиската полиција употреби водени топови и солзавец за да растера група демонстранти кога наидоа на кордон пред седиштето на Европската комисија. Останатите демонстранти мирно демонстрираа поради воведувањето на поостри мерки за корона.
На протестот се собраа неколку илјади луѓе, од кои некои извикуваа: „Слобода“ и носеа транспаренти против задолжителната вакцинација и со натпис „Обединети за нашата слобода, права и нашите деца“.
Белгискиот премиер, Александар Де Крој, во петокот објави дека носењето маска ќе биде задолжително за сите деца над шест години. Децата постари од 10 години досега беа обврзани да носат маска.
Собирите во затворени простории се ограничени на 200. Владата претходно ги затвори ноќните клубови и нареди баровите и рестораните да бидат затворени во 23 часот на три недели.
