ЕМИРАТИ

Турција и Обединетите Арапски Емирати (ОАЕ) потпишаа вкупно десет договори во областа на енергијата, животната средина, финансиите и трговијата за време на посетата на престолонаследникот на Абу Даби, принцот Мухамед бин Зајед Ал Нахјан на Анкара во средата, јавува Anadolu Agency (AA).

Престолонаследникот Ал Нахјан пристигна во турската престолнина Анкара на покана на турскиот претседател Реџеп Таип Ердоган. Посетата на Ал Нахјан е негова прва посета на Турција од 2012 година и прв самит меѓу ОАЕ и Турција во последниве години. Церемонијата на потпишување беше одржана по разговорите меѓу турскиот претседател и престолонаследникот Абу Даби и состанокот на делегациите. Турција и ОАЕ потпишаа меморандум за разбирање за размена на финансиски информации за спречување на перење пари и финансирање тероризам. Беше потпишан уште еден меморандум за разбирање помеѓу компанијата за пристаништа Абу Даби и Турскиот фонд (ТВФ). Abu Dhabi Developmental Holding Company (ADQ), државниот инвестициски фонд на ОАЕ и ТВФ потпишаа два меморандуми за разбирање. ОАЕ, исто така, издвои фонд од 10 милијарди долари за инвестирање во Турција. Потпишан е и меморандум за разбирање помеѓу ADQ и Инвестициската канцеларија при канцеларијата на претседателот на Турција и Берзата во Абу Даби (ADX) и Турската берза во Истанбул. Во меѓувреме, Централната банка на Република Турција и Централната банка на ОАЕ, исто така, потпишаа Меморандум за разбирање. Двете земји потпишаа договор за административна соработка и партнерство во областа на царината. Анкара и Абу Даби потпишаа и меморандуми за разбирање во областите на енергијата и животната средина. Претходно министерот за индустрија и напредна технологија на ОАЕ, султанот Ал Џабер изјави дека се подготвени да постават нови цели за понатамошни инвестиции и соработка во различни сектори со Турција.

Животот во Емиратите денес се движи со незамислива брзина. По повод одбележувањето на 50-годишнината од ОАЕ, се враќаме во минатото за да видиме колку земјата се променила од обединувањето на емиратот во 1971 година. Следниве редови донекаде објаснуваат како брегот на Дубаи за 50 години стана модерно место на кое и завидува остатокот од светот. Кога Светскиот трговски центар во Дубаи бил отворен во 1979 година, се сметало дека тоа е излезот од градот кој тогаш се наоѓал околу реката.

Сепак, развојот на градот во следните години се прошири далеку подалеку од Трговскиот центар, на југ кон Абу Даби и во Арапскиот Залив преку огромните проекти што следеа. Податоците од проектот Google Earth Timelapse покажуваат како брегот на Дубаи е преобликуван со развојни проекти за само неколку децении. Time-lapse, слика со зумирање која покажува како се променила површината на Земјата, започнува со она што беше во оваа област во 1984 година, а највпечатливите промени на брегот што се гледаат овде се пристаништето Џебел Али, во близина на границата со Абу Даби. , и поранешното пристаниште Рашид покрај реката.

До крајот на 1980-тите, можевме да видиме како се појавува голф клубот Емирати. Изградбата потоа забрза, а до 1996 година се појави островот на кој се наоѓа Бурџ Ал Араб. Хотелот е отворен во 1999 година. Се гледа и изградбата на Марина во Дубаи. Веќе во 2001 година, ги гледаме бледите линии на првиот огромен проект за мелиорација во Дубаи – Palm Jumeirah со јасно видливи лисја и полумесечина. Како што напредуваше 2000-тите, беше изградена палмата Џебел Али, а потоа и Светските острови – архипелаг од мали вештачки острови во облик на мапа што се издига од водата.

И двата проекта беа стопирани по глобалната финансиска криза во 2008 година. Time-lapse го покажува и почетокот на изградбата на уште еден проект за палми – Palm Deira, но Nakheel го ребрендирал овој остров Деира во 2013 година. Временскиот период завршува во 2020 година, но покажува и понови крајбрежни проекти кои го прикажуваат идниот развој на Дубаи. Дубаи за 50 години стана еден од најпосакуваните градови во светот, на чиј луксуз и привлечност се восхитуваат оние кои го посетиле, но и чија амбиција е некогаш да дојдат на ова посебно место. 

Од 1 октомври наваму павилјонот на Северна Македонија на Дубаи Експо 2020 го посетиле преку 50.000 посетители. На најголемиот светскиот настан за оваа година земјата се претставува со слоганот „Дом на секој чекор“, а под мотото „Нови можности”. Деновиве на Дубаи Експо е мошне раздвижено, и покрај ковид пандемијата и строгите мерки за влез во Обединетите Арапски Емирати, многу туристи и посетители одат да ги видат павилјоните на земјите претставени на овој настан што се одржува еднаш на десет години и на којшто се презентираат иновативни идеи за технолошки развој, одржливост, бизнис можности, културни и традиоционални вредности, пренесува известувачот на МИА од овој настан.

Светското Експо веќе 170 години претставува платформа за прикажување на најголемите светски иновации. Експо 2020 ја продолжи таа традиција така што голем дел од земјите застапени таму ги презентираат своите најнови технолошки достигнувања.

Оваа манифестација требаше да се одржи минатата година, но поради пандемијата е одложена за оваа година, но домаќините, сепак, го задржаа името како Дубаи Експо 2020. Манифестацијата започна на 1 октомври и ќе трае до 31 март, а претставени се 192 земји. Секојдневно на Дубаи Експо 2020 (expo2020dubai.com) се одржуваат бројни манифестации, а земјите имаат и свој национален ден кога ги претставуваат своите можности.

Дубаи Експо 2020 е сместено на површина од 438 хектари и е лоциран помеѓу градовите Дубаи и Абу Даби, во близина на јужната граница на Дубаи со Абу Даби. Павилјоните се поставени околу централниот плоштад, насловен како Ал Васл, ограден со објекти од трите големи тематски области. Секоја од нив е посветена на една од поттемите на Експо 2020 – Можност, мобилност и одржливост. Локалитетот има центар за итни случаи кој вклучува соба за изолација, соба за итна медицинска помош, амбулантни возила и хеликоптери.

Павилјонот на Република Северна Македонија е отворен со поддршка на домаќинот Обединетите Арапски Емирати, а посетителите имаат уникатна можност директно да се запознаат со културата и традицијата на нашата држава, како и со природните богатства и туристичкиот потенцијал. Изложени се теракоти, артефакти, традиционални носии, промотивни материјали и видео презентации на Северна Македонија.

Посебен фокус е ставен на можностите за економска и трговска соработка, како и инвестицискиот и бизнис потенцијал на земјава, поради што поставени се и дополнителни информативни панели  за слободните економски зони, иновациите, земјоделството, енергетиката и туризмот.

Придобивките од учеството на Северна Македонија на Дубаи Експо 2020 се бројни, од подигнување на видливоста на земјава во регионот на Блискиот Исток и во светски рамки, зголемување на бројот на странски туристи, креирање мрежа на бизнис контакти и можности за зголемување на економската соработка.

Генералниот комесар за Дубаи Експо 2020 Бекри Ајдини во изјава за МИА вели дека Република Северна Македонија учествува со својот павилјон на оваа светска манифестација под мотото „Дом на секој чекор“ и со тоа сака да даде добар симбол и објаснување дека земјата е отворена за сите заедници кои живеат таму и посетители и туристи кои сакаат да ја посетат Северна Македонија.

-Исто така даваме добра порака за сите посетители да се чувствуваат како дома. Во павилјонот од 380 квадрати, 200 квадрати се изложба. Генерално се претставуваме на економски план. Околу 75 отсто од целиот павилјон го покриваме делот на економијата, претставувањето на странските инвестиции, субвенциите кои ги дава државата, планот за економскиот развој, делот за енергетиката, но генерално и во делот турзимот и нашите потенцијали. Освен тоа ја презентираме Република Северна Македонија како држава каде живеат во кохабитација различни етнички групи, различни религии и исто така го покажуваме нашиот историски дел, богатата култура, богатите споменици. Исто така во павилјонот донесовме две препарирани животни, балканскиот рис и златен орел, кои се карактеристични за нашиот регион и кои станаа атракција бидејќи се многу блиски до локалните луѓе во Емиратите и исто така се преознатливи за нив. Исто така посетителите можат да видат и етнички носии кои се исто така карактеристични кои ја претставуваат културата и традицијата во нашата земја, вели Ајдини.

Генерално, потенцира тој, сме фокусирани на туризмот, а Република Северна Македонија е позната туристичка дестинација во сите четири сезони за рзлика од Дубаи каде не е таков случај.

-Затоа го претставуваме Охридското езеро и нашиот летен туризам, зимскиот Попова Шапка, како идна дестинација за туристи и Маврово, ски центарот итн, но и другите сезонски туристички дестинации, рече Ајдини.

Македонскиот павилјон на Дубаи Експо 2020 го посетиле преку 50.000 посетители од целиот свет. Според Ајдини, тоа е показател дека сме интересна и атрактивна дестинација.

-Од почнувањето на Експо 2020 имаме многу посетители што за нас е показател дека сме интересна и атрактивна дестинација, Во овој дел имаме рекорден број посетители блиску 5000 односно 4420 посетители. Исто така во работни денови има околу 2500 посетители додека за викенди таа бројка стасува преку 4000. Генерално за овие 40 дена имаме над 50.000 посетители. Се трудиме да ја претставиме нашата земја таква каква што е со сите убавини и богатства и сме среќни бидејќи имаме голем успех, истакнува тој.

Нашиот национален ден е на 22 февруари 2022 година, кога таму се очекува присуство на највисокото државо раководство. Тогаш ќе се одржи и бизнис конференција, но и културна презентација со настап на наши ансамбли и изложба во нашиот павилјон.

Nova Tv

Претседателот на Парламентот, Талат Џафери и собраниска делегацијата го посетија Павилјонот на Република Северна Македонија на „Експо 2020“ во Дубаи. Како што соопшти собраниската прес-служба, од 1 октомври 2021 година до 31 март 2022 година земјава ќе биде претставена на „Експо 2020“ во Дубаи со слоганот „Дом на секој чекор“, а под мотото „Нови можности“.

Бекри Ајдини, генерален комесар за Северна Македонија на „Експо 2020“ во Дубаи, истакна дека земјата со сопствен павилјон се презентира како успешна приказна, земја со богато историско и културно наследство, каде во хармонија живеат различни етнички заедници.

Претставена е како атрактивна туристичка дестинација во сите четири сезони што нуди можности за авантуристички спортови и највкусна храна. Посебен акцент е ставен на презентирањето на земјата како дестинација на можности за странски инвестиции, бизнис поволности и економска и трговска соработка. Со дополнителни панели се претставени и слободните економски зони, можностите за соработка во земјоделството, енергетиката и сл., истакна Ајдини.

Во текот на презентацијата, Ајдини подвлече дека интересот на компаниите од земјава за учество на „Експо 2020“ во Дубаи е на задоволително ниво, а нивното преставување генерално се одвива преку нашите стопански комори. Предвидено е учество на компании од земјава од сродни сектори во согласност со програмата и неделите на „Експо 2020“. Ќе биде максимално искористена и иницијативата „Отворен Балкан“ за блиска соработка меѓу павилјоните на Република Северна Македонија, Република Србија и Република Албанија во рамки на „Експо 2020“.

Република Северна Македонија ќе биде во центарот на светската јавност на 22 февруари во 2022 година, кога во рамки на „Експо 2020“ во Дубаи ќе се одржи централна културна манифестација и бизнис форум за промоција на инвестициските можности.

Собраниската прес-служба наведува дека како гест на срдечно гостопримство, од домаќините беше организирана и посета на Павилјонот на ОАЕ и на Павилјонот на Саудиска Арабија.

„Експо 2020“ во Дубаи е најголем меѓународен настан на кој учествуваат над 190 земји, а се очекуваат над 25 милиони посетители.

Nova Tv

Претседателот на Собранието на Република Македонија, Талат Џафери, кој е во официјална посета на Обединетите Арапски Емирати, во Абу Даби беше пречекан од неговиот домаќин спикерот на Федералниот национален совет Сагар Ал-Гобаш.

На кусата средба по пристигнувањето на македонската делегација во Абу Даби, Џафери и Ал-Гобаш, како што јави известувачот на МИА, изразија задоволство од продлабочувањето на соработката на двата парламента, што е и една од целите на оваа прва историска посета на претседател на Собранието на Федералниот национален совет на ОАЕ.

Во состав на собраниската делегација која ја предводи првиот човек на законодавниот дом Џафери се и претседателот на Пратеничката група за соработка на Собранието со парламентите на земјите од Блискиот исток и Арапскиот залив, пратеникот Хусни Исмаили, и пратениците Дарко Каевски и Бедри Фазли.

Официјалната билатерална средба на Џафери со Ал-Гобаш е предвидена за утре, кога исто така според агендата се најавени и разговори на парламентарната Делегација на Северна Македонија со членовите на Парламентарната група за пријателство со парламентите од европските земји на Федералниот национален совет на ОАЕ.

На средбите се очекува да стане збор за унапредување на соработката на македонското Собрание со Федералниот национален совет на сите нивоа, но и за интензивирање на севкупните односи и соработка меѓу двете земји, особено на економски план.

Парламентот на Обединетите Арапски Емирати или Федерален национален совет е воспоставен во 1971 година и го сочинуваат 40 пратеници, од кои половината се жени. Во ОАЕ нема регистрирани политички партии и сите мои сакаат да бидат дел од ФНС се кандидираат како независни. Мандатот на избраните пратеници трае четири години. Тие ги претставуваат граѓаните од целата земја, а не само на емиратот од каде што доаѓаат. Бројот на парламентарните места во Федералниот национален совет зависи од бројот на жителите во седумте емирати на ОАЕ. Така емиратот Абу Даби е застапен со осум пратеници, како и Дубаи, емиратите Шарџа и Рас Ал Каиман со по шестмина пратеници, а емиратите Аџман, Ум Ал Куаин и Фуџерја со по четворица пратеници.

Предвидено е последниот ден од престојот во ОАЕ Џафери и собраниската делегација да го искористат за посета на Павилјонот на Република Македонија на „Експо Дубаи 2020”.

Оваа посета на собраниската делегација се совпаѓа со 25-годишнината од воспоставувањето на дипломатските односи меѓу Република Македонија и Обединетите Арапски Емирати.

Во Абу Даби, но и во целата земја деновиве започнаа подготовките за одбележување на 50-годишнината од основањето на ОАЕ. Дрворедите во главниот град веќе се наредени со светлечки украсни палми со бројот 50.

Tv 21

Емирот на Кувајт во саботата издаде два декрети за помилување и намалување на казните на 35 дисиденти, исполнувајќи го клучното барање на опозициските пратеници кои веќе неколку месеци се во конфликт со владата, објави „Reuters“.

Емирот шеик Наваф ал-Ахмед ал-Сабах, го отвори патот за амнестија за политичарите и поранешните пратеници, што опозицијата го постави како услов за ставање крај на политичкиот ќор-сокак што ги попречува планираните фискални реформи во богатата заливска држава.

Објавен во Службен весник, декретот ги укина затворските казни за 11 политичари, меѓу кои Мусалам ал-Барак, Џаман ал-Харбес и Фаисал ал-Муслим, кои беа осудени за упад во зградата на парламентот за време на протестите на Арапската пролет во 2011 година.

Дисидентите, кои им се придружија на демонстрантите во обвинувањето на владата за корупција и лошо управување, живеат во самонаметнат егзил во Турција откако избегаа од Кувајт.

Емирот ги помилува и членовите на таканаречената „ќелија на Адали“, која беше разбиена во 2015 година, кои беа осудени за шпионирање за Иран и либанската шиитска муслиманска група Хезболах.

Владата на Кувајт во понеделникот поднесе оставка до емирот, бидејќи властите работат на ублажување на разликите со парламентот, кои ги блокираа економските реформи и ја оптоварија државната каса поради ниските цени на нафтата.

Емирот допрва треба да ја прифати или отфрли оставката на владата.

Кувајт не дозволува политички партии, но на своето законодавно тело му даде поголемо влијание од сличните тела во другите монархии во Персискиот залив, вклучително и овластување да донесува и блокира закони, да испрашува министри и да поднесува гласови за недоверба на високи владини функционери.

„Dubai-Portal“
„MEMO“