Потпретседателот на САД, Џ.Д. Венс, е во Велика Британија, каде што се сретна со министерот за надворешни работи, Дејвид Лами.
Во таа пригода, тој нагласи дека американскиот претседател Доналд Трамп нема намера да ја признае Палестина како независна држава.
Овој состанок е продолжение на претходните разговори одржани во Шкотска меѓу Трамп и британскиот премиер Кир Стармер, а една од клучните теми беше ситуацијата на Блискиот Исток.
„Велика Британија ќе донесе свои одлуки, но САД немаат планови да признаат палестинска држава. Во моментов таму нема функционална влада, а нашиот фокус е јасен – имаме две цели во врска со Израел и Газа“, рече Венс.
Според него, приоритетите на САД се целосно елиминирање на Хамас и зајакнување на хуманитарниот капацитет за помош на цивилите во Појасот Газа.
„Тоа е проблем што не е лесно да се реши, бидејќи во спротивно веќе би бил решен. Сепак, убеден сум дека ја делиме истата цел, иако можеби немаме идентични идеи за тоа како да ја постигнеме“, заклучи американскиот потпретседател.
