Во Албанија беше отворена тактичка воздушна база на НАТО, што, според албанските власти, и дава на земјата ново геостратешко значење.
На свеченото отворање на воздухопловната база во градот Кучова, во областа Берат, присуствуваа претседателот на Албанија Бајрам Бегај, претседателката на Собранието на Албанија Линдита Никола, премиерот Еди Рама, министерот за одбрана на Албанија Нико Пелеши и други министри од кабинетот. Присутни беа и косовскиот министер за одбрана Ејуп Македончи, министерката за одбрана на Северна Македонија Славјанка Петровска, италијанскиот министер за одбрана Гидо Крозето, претставници на НАТО и земјите членки на Алијансата.
Албанскиот претседател Бајрам Бегај истакна дека оваа база е резултат на соработката, солидарноста, координацијата меѓу сојузниците и вниманието што Албанија го посветува на безбедноста и одбраната.
– Од оваа база заедно испраќаме силна порака за мир и докажуваме дека НАТО е решен да ја заштити слободата и безбедноста на сојузниците, гарантирајќи колективна одбрана – рече Бегај.
Претседателката на Собранието, Линдита Никола, рече дека е тешко да се најде земја-членка на Алијансата која само по деценија и пол членство во Алијансата станала достоен партнер, искрен и ефикасно придонесува за заштитата. на мирот и безбедноста.
Албанскиот премиер Рама рече дека базата е уште еден елемент за безбедност за регионот на Западен Балкан, кој е изложен на „закани и неоимперијалистички амбиции на Руската Федерација“.
