Израелскиот министер за одбрана, Израел Кац, откри план за преместување на сите Палестинци од Газа во голем камп во урнатините на градот Рафа, во она што правните експерти и академиците го опишаа како оперативен план за извршување злосторства против човештвото.
Според израелскиот весник „Хаарец“, Кац ѝ наредил на војската да започне со подготовки за изградба на таканаречен „хуманитарен град“, кој би бил под целосна израелска контрола. Влезот би бил можен само по безбедносни проверки, а излегувањето од зоната би било забрането.
Според него, планот вклучува почетно преместување на околу 600.000 Палестинци, претежно оние кои моментално се раселени во областа Ал-Маваси, со крајна цел да се концентрира целото население на Газа во таа зона. Во обраќање до новинарите, Кац, исто така, најави спроведување на план за „емиграција на Палестинците“, нагласувајќи дека тоа „ќе се случи“.
Планот доаѓа непосредно пред израелскиот премиер Бенјамин Нетанјаху да пристигне во Вашингтон на разговори со американскиот претседател Доналд Трамп, за време на кои ќе се разговара за евентуално прекин на огнот во 21-месечната војна.
Израелскиот адвокат за човекови права, Мајкл Сфард, предупреди дека ова е сериозно кршење на меѓународното право:
„Кац презентираше оперативен план за злосторство против човештвото. Трансферот и депортацијата на населението во овие околности претставува воено злосторство, а во голем обем, злосторство против човештвото.“
Сфард рече дека присилната „емиграција“, иако опишана како „доброволна“, се одвива под таков притисок што никакво заминување од Газа не може законски да се смета за слободна одлука.
Историчарот за холокаустот, Амос Голдберг, рече дека планот на израелскиот министер наликува на модел на концентрационен логор:
„Ова не е ниту хуманитарен ниту град. Тоа е логор каде што нема живот, нема работа, нема образование, нема слобода на движење. Ова е етничко чистење, маскирано како хуманитарна иницијатива.“
Кац објави дека работата на кампот би можела да започне за време на прекинот на огнот. Нетанјаху, зборувајќи од Белата куќа, рече дека Израел и САД се консултираат со други земји кои би биле подготвени да ги „прифатат Палестинците“ и „да ја подобрат нивната иднина“.
Во меѓувреме, Ројтерс објави дека претходно на администрацијата на Трамп ѝ бил презентиран план од 2 милијарди долари, спонзориран од Хуманитарната фондација за Газа (GHF), кој предвидува изградба на „хуманитарни транзитни зони“ во и надвор од Газа. Иако GHF негира дека е автор на документот, планот предизвика дополнителни загрижености.
Британскиот весник „Гардијан“ истакнува дека резервистите на израелската армија веќе поднеле жалби во судовите против наредбите за преместување на цивилите, но канцеларијата на началникот на Генералштабот Ејал Замир претходно тврдеше дека „раселувањето на населението не е цел на операцијата“. Изјавите на Кац директно се спротивставуваат на неговите тврдења.
Критичарите предупредуваат дека планот не предвидува што ќе се случи со Палестинците кои одбиваат да влезат во кампот и дека секој отпор би можел да биде брутално потиснат.
Се очекуваат меѓународни реакции на планот, додека правните експерти предупредуваат дека неговото спроведување би претставувало флагрантно кршење на Женевските конвенции и темелите на меѓународното хуманитарно право.
