Легендарниот британски музичар Ерик Клептон синоќа на својот профил на социјалната мрежа X најави „интимен концерт во живо“, пишувајќи само дека тој доаѓа наскоро. Заедно со објавата, тој објави и фотографија од девојка која носи хиџаб, што е алузија на поддршка на палестинските деца во Газа кои се изложени на невиден терор од страна на израелските сили.
Ова ќе биде втор концерт од ваков вид од почетокот на бруталните напади на Израел врз Газа. Во декември 2023 година беше објавен онлајн концерт на легендарниот британски рокер за да се соберат средства за децата од Газа. Приходите од билетите за онлајн емитувањето – насловено „Да се спаси дете“ – беше наменето за помош на Газа, која е цел на израелската војна против Палестинците.
Клептон потоа настапи со гитара обоена во боите на палестинското знаме. Сетот ги вклучуваше песните „Tears In Heaven“, „Got To Get Better In A Little while“ и „Give Me Love (Give Me Peace On Earth)“ од Џорџ Харисон со Дани Харисон.
Во ноември, Клептон објави нова песна придружена со видео кое прикажува слики од широко распространето уништување во Појасот Газа и пропалестински протести ширум светот.
Клептон, кој има настапувано во Израел во минатото, поддржа петиција минатата година со која се осудува одлуката на градскиот совет на Франкфурт да го откаже концертот на Роџер Вотерс поради неговите наводни антисемитски и антиизраелски забелешки.
