Во Загреб попладнево започна голем протест против ковид потврдите и епидемиолошките мерки, пренесуваат локалните медиуми.
Собирот на граѓани започна на плоштадот на Француската Република и на плоштадот на жртвите на фашизмот, а според проценките околу 15 часот на двете локации имало неколку илјади граѓани.
Загребската полиција соопшти дека денешниот протест во Загреб не е пријавен и дека ќе ги снима учесниците на собирот.
Во пресрет на протестот, дел од граѓаните ги искажаа своите барања за укинување на ковид потврдите, тврдејќи дека граѓаните кои немаат потврда се противуставно и незаконски исклучени од општествениот живот и им се оневозможува пристап до работа, студирање и основното уставно право на работа.
„Наша граѓанска должност е да се спротивставиме на дискриминацијата на секој човек, да се спротивставиме на општествените поделби и користењето на оваа дискриминаторска потврда како основа за тоа”, се вели во соопштението потпишано од граѓани, учесници на „Белиот тивок марш”.
Собири против ковид пропусниците и другите мерки за борба против коронавирусот во Загреб се одржуваа и во претходните денови, како и во некои други хрватски градови.
