Турскиот претседател Реџеп Таип Ердоган ја поздрави денешната одлука за привремените мерки на Меѓународниот суд на правдата (МСП) во случајот за геноцид против Израел, опишувајќи ги привремените мерки донесени како „вредни“.
– Ова е важна одлука на Меѓународниот суд на правдата за привремените мерки во врска со нехуманите напади на Израел врз Газа и ја поздравувам – рече Ердоган во објава на социјалната мрежа Х.
Ердоган, исто така, рече дека Турција ќе продолжи да работи со сите сили и да застане на страната на палестинските браќа во напорите да се воспостави прекин на огнот и да се обезбеди патот кон траен мир.
– Ќе продолжиме да го следиме процесот за да се осигураме дека воените злосторства извршени врз невини палестински цивили нема да останат неказнети – рече Ердоган.
Неговите коментари уследија откако МСП му нареди на Израел да ги „преземе сите мерки во негова моќ“ за да спречи понатамошно крвопролевање во Газа во согласност со неговите обврски од Конвенцијата за спречување и казнување на злосторството геноцид. Судот повика и на итно ослободување на сите заложници.
