Преодниот премиер на Либан, Наџиб Микати, се закани дека ќе ги протера сириските бегалци од земјата доколку меѓународната заедница не ги врати во татковината.
„Единаесет години по почетокот на сириската криза, Либан веќе нема капацитет да го носи овој товар, особено под сегашните околности“, рече Микати во говорот по повод либанскиот план за одговор на кризи 2022-2023 година, кој е поддржан од ОН.
Микати ја повика меѓународната заедница да соработува со Бејрут за враќање на сириските бегалци во нивната земја.
„Либан доживува една од најтешките економски, финансиски, социјални и политички кризи во светот и, како резултат на тоа, околу 85 отсто од либанскиот народ живее под прагот на сиромаштија“, рече тој.
Од крајот на 2019 година, Либан се бори со тешка економска криза, вклучително и масовна депрецијација на валутата, како и недостиг на гориво и медицински производи.
Според податоците на ОН, Либан е домаќин на околу 1,5 милиони сириски бегалци, што претставува речиси четвртина од населението на Либан, покрај речиси половина милион палестински бегалци кои живеат во земјата од 1948 година.
, „Dubai-Portal“
