Државната изборна комисија информираше дека на неколку избирачки места низ Македонија гласањето не започнало точно во 7 часот, поради технички проблеми при најавувањето со корисничко име и пасворд на уредот за отчитување на отисоците на прст.
Од таму додаваат дека во овој момент и на тие гласачки места е започнато гласањето, а доколку прекинот бил подолг од половина час гласањето на тоа избирачко место ќе биде продолжено по 19 часот.
„Кога зборуваме за технички проблеми, најголем дел се однесуваат на употребата на уредите за биометриска идентификација. Од она што го имаме до сега како информација е неможност да се логираат претседателите на избирачките одбори во уредот, нечитливи лозинки итн., меѓутоа веднаш се интервенира на лице место за да продолжи нормално гласањето“, посочи Гугучевска.
Таа додава дека доколку не може да се најде совпаѓање од десниот и левиот показалец на гласачот, избирачките одбори треба веднаш да ја скенираат личниот документ во МР скенерот во склоп на самиот уред.
Засега изборниот процес за избор на 44 градоначалници во Македонија тече во фер и демократска атмосфера без посериозни регистрирани нарушувања на изборниот ден.
Tv 21
